Site Name

EBLA 11, 2009,  Toronto, Kanaadaa

Nuti miseensonni ABO Kutaa Kanaadaa teessoo, marii waliigalaa fi work shopi guyyaa lamaaf haala gaariin gaggeeffachuu dhaan Guyyaa ayyaana gootota Oromoos hawaasa keenyaan waliin ta’uu dhaan sirna ho’aan kabajannee jirra. Kora keenya kana irrattis kan argaman J/Tamaam Youssouf miseensa Shanee Gumii Gumii Sabaa ABO fi  Gaafatamaa Damee Dantaa  Alaa ABO,  bakka buutuu Koree Kutaa  USA, Qondaalota Koree Kutaa Kaanadaa,  miseensota ABO Konyaalee Kutaa Kaanadaa fi bakka bu’oota Caayaalee ABO Kutaa kaanadaa ti. Haaluma kanaan Kora Xiqqaa Kutaa Kaanadaa kan bara 2009 milkii fi injifannoon xumurachuu dhaan ibsa ejjennoo armaan gadii sagalee tokkon dabarfannee jirra.

1. Qajeelfamaa fi dirqama dhaabni keenya ABOn yeroo yerootti dabarsuu fi baasu akka wal-duraa duubaatti kan duraanii caalaatti dalagaatti fassaruu fi bahuu dhaaf qophii ta’uu keenyaaf waadaa miseensummaa keenyaa ni haaromsina.
2. Ibsa karaa hooggana dhaabaa fi qondaalota Kutaa keenyaan kenname yaadaa fi qalbii guutuun caqasnee dalagaatti hiikuuf onnee guutuun fudhanneerra.
3. Kaayyoo goototni keenya itti wareegaman bakkaan gahuuf ammas jabaannee ni qabsoofna.
4. Gaachana qabsoo bilisummaa Oromoo kan tahe WBO jabeessuudhaaf tinnisaa fi deggersa barbaachisu hanga kaayyoon keenya dhugoomutti akkuma duraaniitti jabaannee ni gumaachina
5. Rakkoo fi dadhabbiilee gara garaa irraa kan ka’e sagantaalee bara dabre itti hin milkaawinitti   bara kana  milkii gaarii argamsiisuuf qindoomina haarawaan hojjachuuf murteeffanne.
6. Qabsoo bilisummaa Oromoo milkeessuuf qabsoo dhaabni keenya ABOn gaggeessaa jiru keessatti qoonni Kutaan keenya laachaa jiru bakka guddaa qabaatullee qoonni laanne gahaa miti jannee waan amannuuf ar’arraa kaafnee qooda nurraa eeggamu olkaasuuf murteefanne.
7. Adunyaan keessa jirru tan nama  humna qabuu ta’uun arra namuufuu  ifa. Oromooniis  mirga humnaan saamame deeffatee Abbaa biyyumaa isaa mirkaneessuuf murteessaan qabsoo Oromotti humna horuu qofa waan ta’eef kana mirkaneessuuf dirqama dhaabni keenya nutti  kennu bakkaan gahuuf qophii dha.
8.  Olollii fi Shororkaan diina fi masaanuu qabsoo keenyaa yoomiyyuu nu hin gowwoomsu, Dhaaba  keenya ABO  rirma keessaa fi diina alaa irraa cimnee ni tikfanna.
9. Sabboonummaa fi tokkummaa keenya daran hojii dhaan mirkaneessuuf ammallee irra deebinee irbuu keenya haaromsuu dhaan waadaa oromummaa ni seenna.